美研究：一個人食飯容易變肥！

有啲人可能覺得自己一個人食飯冇咩所謂，但原來係有所謂㗎，因為美國一項研究發現，一個人如果喺內心孤獨嘅情況之下自己一個食飯，食量容易增加而變肥。

 

美國德拉瓦大學心理與腦科學學院嘅教授同佢嘅研究團隊，用科學方法嚟測量孤獨同食量之間嘅關係，希望了解孤獨同單身女性嘅飲食習慣兩者有咩因果關係。實驗入面，42個參與者首先要禁食12個鐘，然後再畀佢哋食接近1000卡路里嘅食物，最後由研究人員分別採血紀錄佢哋飯前同飯後嘅血液狀態。

 

研究主要想觀察血液濃度入面嘅飢餓素，飢餓素由刺激食慾嘅功能，如果分泌太多會導致肥胖。而研究指出，越覺得孤獨嘅人分泌嘅飢餓素越高，變相會食越多嘢。

 

負責研究嘅教授表示，空肚感聯繫咗孤獨同體重，而食飯係一種人類社交本能，能夠維持情感聯繫，所以一枝公食飯就好容易會化空虛寂寞為食量，不停進食喇。

 

唔怪得我咁肥啦......

 

原本連結：https://hk.style.yahoo.com/%E7%BE%8E%E7%A0%94%E7%A9%B6-%E5%80%8B%E4%BA%BA%E9%A3%9F%E9%A3%AF%E5%AE%B9%E6%98%93%E8%AE%8A%E8%82%A5-1720048085671990.html